ایبٹ آباد (محاسب نیوز)کمشنر ہزارہ ڈویژن فیاض علی شاہ کی زیر صدارت مانیٹرنگ اینڈ ایویلیوایشن کی آپریشنل کمیٹی کا اجلاس منگل کے روز منعقد ہوا، جس میں تمام ڈپٹی کمشنرز اور متعلقہ افسران نے شرکت کی۔اجلاس میں ڈپٹی ڈائریکٹر (ایم اینڈ ای) نے ہزارہ ڈویژن میں جاری ترقیاتی اسکیموں کی پیش رفت، خامیوں اور مجموعی صورتحال پر تفصیلی بریفنگ دی۔کمشنر ہزارہ ڈویژن نے اس موقع پر خطاب کرتے ہوئے کہا کہ ترقیاتی منصوبوں کے معیار پر کسی قسم کا سمجھوتہ نہیں کیا جائے گا اور تمام اسکیموں کو مقررہ وقت میں مکمل کرنا لازمی ہے۔ انہوں نے ہدایت کی کہ کم لاگت مگر زیادہ عوامی فائدے والی اسکیموں کو ترجیحی بنیادوں پر معیار کے مطابق مکمل کیا جائے تاکہ عوام حکومت کی نیک نیتی کے ثمرات سے مستفید ہو سکیں۔مزید برآں انہوں نے تمام ڈپٹی کمشنرز کو ہدایت دی کہ وہ اپنے اضلاع میں لائن ڈیپارٹمنٹس کے سربراہان کو اسکیموں کے مقامات کے دورے کا پلان دیں اور ان سے فیڈبیک بھی حاصل کریں۔کمشنر ہزارہ ڈویژن نے مزید کہا کہ ہر ضلع میں مانیٹرنگ اینڈ ایویلیوایشن کا ماہانہ اجلاس باقاعدگی سے منعقد کیا جائے، اور معمولی، بڑے اور سنگین نوعیت کے مسائل متعلقہ محکموں کے ساتھ بیٹھ کر حل کیے جائیں۔انہوں نے آخر میں یہ ہدایت بھی جاری کی کہ وہ اسکیمیں جو 70 فیصد سے زائد مکمل ہو چکی ہیں انہیں ترجیحی بنیادوں پر جلد از جلد پایہ? تکمیل تک پہنچایا جائے۔
