Mahasib: Latest News | Urdu News

ایکشن کمیٹی کی اپیل پر کامیاب ہڑتال‘حکومت مطالبات پورے کرے‘ اکسیر میر

مظفرآباد( )جنرل سیکرٹری انجمن تاجران سبزی فروٹ منڈی اکسیر میر نے گزشتہ روز چیئرمین مرکزی انجمن تاجران مظفرآباد شوکت نواز میر کو 05اکتوبر2023 کی کامیاب شٹرڈاؤن وپہیہ جام ہڑتال اور گیلانی چوک میں ہزاروں افراد کا احتجاجی اجتماع کرانے پران کی رہائش گاہ پر جاکر گلدستہ پیش کرکے مبارکباد دی۔ چیئرمین شوکت نواز میرنے بھی اکسیر میر کی مستقل مزاجی اور عوامی تحریک میں ہمیشہ کی طرح بھرپور کردار ادا کرنے کو زبردست الفاظ میں سراہاہے۔ جنرل سیکرٹری انجمن تاجران سبزی فروٹ منڈی اکسیر میرنے اپنی گفتگو میں کہاہے کہ بجلی بلوں میں ظالمانہ ٹیکس کسی صورت قبول نہیں ہیں۔حکومت جوائنٹ عوامی ایکشن کمیٹی کے چارٹر آف ڈیمانڈ پر عملدرآمد یقینی بنائے۔ عوامی حقوق کی جدوجہد جاری رہے گی۔پکڑ دھکڑ اور گرفتاریاں ہمیں عوام کے حقوق کیلئے جدوجہد کرنے سے نہیں روک سکتیں۔10اکتوبر کو خواتین کا بھرپور احتجاج ہوگا۔ہماری جدوجہد جائز مطالبات کیلئے ہے اس سے پیچھے ہرگز نہیں ہٹیں گے۔ جوائنٹ عوامی ایکشن کمیٹی کی کال پر چیئرمین مرکزی انجمن تاجران مظفرآباد شوکت نواز میر کی قیادت میں لبیک کہیں گے۔

میاں نواز شریف کی وطن واپسی پر شاہ غلام قادر کل دن دس بجے ہٹیاں بالا روانہ ہونگے

چناری(تحصیل رپورٹر) میاں نواز شریف کی وطن واپسی صدر پاکستان مسلم لیگ (ن) آذاد جموں وکشمیر شاہ غلام قادر کل دن دس بجے ہٹیاں بالا تشریف لا رہے ہیں اس موقع پر سابق وزیر اعظم راجہ محمد فاروق حیدر خان، سیکرٹری جنرل چوہدری طارق فاروق۔سنئیر نائب صدر راجہ مشتاق مہناس، ممبر قانون ساز اسمبلی محترمہ نثارہ عباسی۔سابق وزیر بیرسٹر سید افتحار گیلانی، ڈاکٹر مصطفی بشیر عباسی، محترمہ نورین عارف،راجہ عبد القیوم خان، سابق امیدوار اسمبلی حلقہ شرقی باغ چوہدری اعجاز کھٹانہ، مرکزی صدر خواتین ونگ مریم کشمیری، صدر مسلم لیگ (ن) ضلع مظفرآبا د راجہ فراز عارف،ودیگر قیادت شریک ہو گی کارکنان مسلم لیگ (ن) ضلع جہلم ویلی نے بھرپور استقبال کے لیے تیاریاں مکمل کر لی ہیں میاں محمد نواز شریف کی وطن واپسی پران کے شاندار استقبال کے حوالہ سے اہم فیصلہ جات کیے جائیں گے

بار ایسوسی ایشنز نے ہمیشہ قانون و آئین کی بالادستی اور انصاف کی فراہمی کے لیے لئے کلیدی کردار ادا کیا ہے، جسٹس صداقت حسین راجہ

مظفرآباد (پی آئی ڈی) چیف جسٹس آزادجموں و کشمیر ہائی کورٹ جسٹس صداقت حسین راجہ نے کہا ہے کہ بار ایسوسی ایشنز نے ہمیشہ قانون و آئین کی بالادستی اور انصاف کی فراہمی کے لیے لئے کلیدی کردار ادا کیا ہے۔ وکلاء ہمیشہ کالے کوٹ کی تکریم کو برقرار رکھیں بار سیکھنے کی جگہ ہے، سینٹرل بار سے بہت عزت ملی ، وکلا ء سنٹرل بار کی روایات اور معیار کو برقرار رکھیں۔ان خیالات کا اظہار چیف جسٹس آزادجموں و کشمیر جسٹس صداقت حسین راجہ نے سینٹر ل بار ایسوسی ایشن مظفر آباد کے زیراہتمام نو منتخب ممبران ڈسٹرکٹ بار کے اعزاز میں منعقد کی گئی تقریب تقسیم لائسنس سے خطاب کرتے ہوئے کیا۔ چیف جسٹس آزادجموں و کشمیر نے کہا کہ وکالت ایک معزز پیشہ ہے، انصاف کا بول بالا کرنے کے لیے ضروری ہے کہ نئے وکلا پروفیشنل مہارت حاصل کریں۔ نئے وکلا ٹرائل دیکھیں اور سیکھیں، انھوں نے کہا کہ وکلا کالے کوٹ کے حقوق کے محافظ ہیں، بار سے بے پناہ عزت ملی۔ آج بھی خود کو سینٹرل بار کا ممبر سمجھتاہوں۔ اس موقع پر صدر سینٹرل بار رایسوسی ایشن راجہ آفتاب نے کہا کہ وکلا کی فلاح کے لیے بار نے بڑھ چڑھ کر حصہ کام کیا ہے، وکلا پروفیشنلز م کو فروغ دیں اور انصاف کے فروغ کے لیے کام کریں۔تقریب میں ایڈیشنل ڈسٹرکٹ جج، راجہ شکیل، ایڈیشنل ڈسٹرکٹ/ جج احتساب کورٹ، ڈسٹرکٹ اینڈ سیشن جج، حافظ محمد فاروق، ایڈشنل ڈسٹرکٹ / جج فیملی کورٹ، ممبر ان بار کونسل اشفاق حسین کاظمی ایڈوکیٹ، چوہدری شوکت عزیز ایڈووکیٹ، راجہ ایاز فرید ایڈووکیٹ، ہارون ریاض مغل ایڈٖووکیٹ سمیت وکلاء کی بڑی تعداد نے بھی شرکت کی۔ جبکہ اس موقع پر چیف جسٹس ہائی کورٹ صداقت حسین راجہ نے ڈسٹرکٹ بار ایسوسی ایشن کے نومنتخب ممبران میں سرٹیفیکٹس بھی تقسیم کیے۔

آزادکشمیر کی کل آبادی 40لاکھ کے قریب ہے جس میں سے 15لاکھ تارکین وطن ہیں احسان خالد کیانی

خیبر پختونخواہ پری سروس پلاننگ کورس کے 44رکنی وفد کا دورہ مظفرآباد۔ ایڈیشنل چیف سیکرٹری جنرل احسان خالد کیانی، سیکرٹری سروسز اینڈ جنرل ایڈمنسٹریشن سردار ظفر محمود اور سیکرٹری مالیات عصمت اللہ شاہ کی بریفنگ۔ وفد کو بریفنگ دیتے ہوئے ایڈیشنل چیف سیکرٹری جنرل احسان خالد کیانی نے بتایا کہ آز ادکشمیر کی حکومت 24اکتوبر 1947کو قائم ہوئی۔ یہاں پارلیمانی نظام حکومت قائم ہے۔ ریاست کی اپنی قانون ساز اسمبلی، سپریم کورٹ اور ہائی کورٹ ہیں۔ ریاست کے دفاع، کرنسی، فارن پالیسی اور سیکیورٹی وفاقی حکومت کے ذمہ ہے۔ ریاست کے 3ڈویژن اور 10اضلاع ہیں۔ آزادکشمیر کا اپنا آئین بھی موجود ہے۔ انہوں نے کہا کہ آزادکشمیر ایک پر امن علاقہ ہے۔ جبکہ دوسری جانب مقبوضہ کشمیر میں ہندوستان انسانی حقوق کی سنگین پامالیوں کا مرتکب ہو رہا ہے۔ ہماری شرح خواندگی ملک کے دیگر صوبوں سے بہت بہتر ہے۔ آزادکشمیر کی کل آبادی 40لاکھ کے قریب ہے جس میں سے 15لاکھ تارکین وطن ہیں۔ آزادکشمیر میں بہترین تعمیر و ترقی کا عمل جاری ہے۔ دور دراز علاقوں میں سڑکوں کی سہولیات میسر ہیں۔ سیاحت اورہائیڈرل کا وسیع پوٹینشل موجود ہے۔ وفد کو بریفنگ دیتے ہوئے سیکرٹری مالیات عصمت اللہ شاہ نے کہا کہ آزادکشمیر کا کل بجٹ 232بلین روپے ہے۔ جس میں سے 42بلین ترقیاتی بجٹ ہے۔ ریاست کے ریسورسز بہت کم ہیں۔ اس لیے وفاقی حکومت ہمیں سپیشل گرانٹ دیتی ہے۔ ٹیکس جمع کرنے کے لیے ہمارا سی بی آر کا ادارہ موجود ہے۔ سیکرٹری سروسز اینڈ جنرل ایڈمنسٹریشن سردار ظفرمحمود نے کہا کہ آزادکشمیر میں دیگر صوبوں کی طرح مکمل سروس سٹرکچر موجود ہے جو رولز آف بزنس کے تحت کام کر رہا ہے۔ یہاں چیف سیکرٹری، انسپکٹر جنرل پولیس، اکانٹنٹ جنرل اور سیکرٹری مالیات وفاقی حکومت کی جانب سے تعینات ہوتے ہیں۔بریفنگ کے اختتام پر وفد کے سربراہ اعجاز احمد نے ایڈیشنل چیف سیکرٹری جنرل احسان خالد کیانی کو سوینئیر بھی دیا

ڈسٹرکٹ ہسپتال سدھنوتی میں صاف پانی کی فراہمی کے لیے پائپ لائن کا کام شروع

ڈسٹرکٹ ہسپتال سدھنوتی میں صاف پانی کی فراہمی کے لیے پائپ لائن بچھائی کا کام مزید تیز کر دیا گیا۔مہتمم تعمیرات عامہ عمارات ڈویژن سردار اجمل مصطفیٰ نے جاری کام کا معائنہ کیا اور موقع پر کام کی رفتار کو مزید تیز کرنے کی ہدایت کی۔ ڈسٹرکٹ ہسپتال سدھنوتی میں بقایا کام ہاسٹلز،پارک اور پانی کی فراہمی کے لیے منصوبہ کو جلد مکمل کرنے کے لیے وزیر اعظم آزاد کشمیر نے خصوصی احکامات دیے ہیں۔ ہسپتال میں صاف پانی کی قلت کی وجہ سے مشکلات درپیش تھیں جس کے لیے جلد ہی پائپ لائن کی بچھائی مکمل کر دی جائے گی اور گریٹر واٹر سپلائی اسکیم سے ہسپتال کو پانی کی فراہمی شروع ہو جائے گی۔ کام کے معائنہ کے دوران مہتمم تعمیرات نے کام کے معائنہ کے دوران گفتگو کرتے ہوئے کہا کہ وزیراعظم آزاد کشمیر نے واٹر سپلائی اسکیم کے لیے بروقت فنڈز فراہم کرنے کی یقین دھانی کرائی ہے۔ انہوں نے کہا کہ ہسپتال میں پانی کے لیے بچھائی جانے والی پائپ لائن منصوبے کو جلد مکمل کریں گی جبکہ ہسپتال میں بقایا کام ڈاکٹرز ہاسٹلز کی عمارات مکمل ہیں جو آئندہ چند روز میں ان کا افتتاح کروایا جائے گا #/S

آزاد کشمیر کے سابق وزیر چوھدری مقبول گجرقانون ساز اسمبلی کی نشست سے محروم

آزادکشمیرالیکشن ٹربیونل نے قانون ساز اسمبلی کے حلقے ایل اے 35 جموں دو کے انتخابات 2021 کا نتیجہ کالعدم قرار دے دیا ہے ۔ پاکستان تحریک انصاف( پی ٹی آئی ) کے ممبر اسمبلی چوہدری مقبول گجر کی اسمبلی رکنیت ختم ہوگئی ہے۔ چوہدری مقبو ل گجر الیکشن میں دھاندلی کرنے کا جرم ثابت ہونے پر اپنی نشست سے محروم ہوگئے۔ انتخابات 2021 میں اس حلقے سے پاکستان تحریک انصاف( پی ٹی آئی )کے ممبر قانون ساز اسمبلی چوھدری مقبول گجر منتخب ہوئے تھے۔ پاکستان مسلم لیگ ن کے چوھدری اسماعیل گجر کی انتخابی عذرداری پر الیکشن ٹربیونل نے محفوظ فیصلہ سنا دیا ۔آزادکشمیرالیکشن ٹربیونل نے قرار دیا ہے کہ پولنگ اسٹیشن کے نتائج میں ردوبدل کرکے درخواست گزارچوھدری اسماعیل گجر کے ووٹ کم ظاہر کیے گئے ہیں۔آٹھ پولنگ سٹیشن کے کاونٹر فائیلز خالی پائی گئیں جو الیکشن ایکٹ کے دفعہ 60 کی خلاف ورزی ہے۔یہ تمام عمل نتائج کو مشکوک بنا تا ہے۔،آزادکشمیرالیکشن ٹربیونل نے چوہدری مقبول گجر کی کامیابی کا نوٹیفکیشن منسوخ کرتے ہوئے ایل اے 35 جموں دو کے انتخابات دوباہ کرانے کا حکم دیا ہے ۔آزادکشمیرالیکشن ٹربیونل نے الیکشن کمیشن کو حکم دیا ہے کہ انتخابی قواعد کی خلاف ورزی پر پریزائیڈنگ افسر کے خلاف کارروائی کی جائے ۔ پاکستان مسلم لیگ نون کے چوھدری اسماعیل گجر نے قانون ساز اسمبلی کے حلقے ایل اے 35 جموں کے انتخابات 2021 کا نتیجہ چیلنج کیا تھا ۔چوھدری اسماعیل گجر کی طرف سے راجہ سجاد ایڈووکیٹ آزادکشمیرالیکشن ٹربیونل میں انتخابی نتیجہ چیلنج کیا تھا۔ الیکشن ٹربیونل میں مقابل امیدوار چودہری اسماعیل نے نتائج کو چیلنج کرتے ہوئے موقف اپنایا تھا کہ ریٹرنگ آفیسر نے نتائج تبدیل کئے ہیں

عالمی برادری یوکرائن کی طرح کشمیریوں کے حق خودارادیت کی بھی پشتیبانی کرے،جماعت اسلامی آزاد کشمیر

جماعت اسلامی آزادجموں وکشمیرگلگت بلتستان کی مرکزی مجلس شوریٰ نے اپیل کی ہے کہ عالمی برادری یوکرائن کی طرح کشمیریوں کے حق خودارادیت کی بھی پشتیبانی کرے۔جماعت اسلامی آزادجموں وکشمیرگلگت بلتستان کی مرکزی مجلس شوریٰ کے اجلاس میں پاس ہونے والی قراردادوں میں کہا گیا ہے کہ یہ اجلاس شہدائ،غازیوں اور مقبوضہ جموں وکشمیر کے قائدین،مائوں بہنوں،نوجوانوں اور حریت پسند عوام الناس کی بے مثال جدوجہد کو خراج تحسین پیش کرتا ہے ۔ اجلاس عالمی برادری سے مطالبہ کرتا ہے کہ Genocide Watchکے سربراہ کی گواہی اور اقوام متحدہ کے کمشنر فار ہیومن رائٹس کی 2رپورٹس کی بنیاد پر ہندوستان کو میانمار کی طرح ICJکے کٹہرے میں کھڑا کیا جائے ۔یہ اجلاس جنگ بندی لائن کو مستقل سرحد بنانے ریاست کی وحدت کو سبوثاژ کرنے کے لیے ایسے اقدامات کو جن سے اس تصور تقویت ملتی ہے مسترد کرتا ہے اور واضح کرتا ہے کہ وہ پاک بھارت باہم تعلقات کو مسئلہ جموں وکشمیر پر پیش رفت سے مشروط کیا جائے اور جب تک ہندوستان5اگست2019ء کے اقدامات کو واپس نہ لے مذاکرات اور باہم تجارت سے احتراز کیا جائے۔اجلاس بین الاقوامی اداروں سے مطالبہ کرتا ہے کہ کشمیریوں کے حق خودارادیت کی تحریک سفارتی سطح پر اس طرح پشتیبانی کی جائے جس طرح یوکرائن کی کی جارہی ہے اور کشمیریوں کا حق مزاحمت بحال کیا جائے یہ اجلاس ہندوستان کی طرف سے اقوام متحدہ کے چارٹر،سلامتی کونسل کی قراردادوںاوربین الاقوامی انسانی حقوق کی سنگین خلاف ورزیاں کرتے ہوئے مقبوضہ جموں وکشمیر پر اپنے غیر قانونی،جابرانہ قبضے کو دوام بخشنے کی ناکام سازشوں کو عالمی امن اور خصوصاً جنوبی ایشیا کے امن کے لیے سنگین خطرہ سمجھتا ہے۔اجلاس ہندوستانی حکومت کی طرف سے مقبوضہ جموں وکشمیر میں 45لاکھ غیر ریاستی باشندوں کو ڈومسائل جاری کرکے آئندہ انتخابات میں ہندو وزیر اعلیٰ کو اقتدار میں لانے کی غیر آئینی اور غیر قانونی سازش کی مذمت کرتا ہے۔یہ اجلاس اقوام متحدہ اور عالمی اداروں سے مطالبہ کرتا ہے کہ اس بین الاقوامی فراڈ کو روکنے کے لیے اقدامات کیے جائیں ۔ ہندوستان سے تجارتی تعلقات کی بحالی کی پاکستانی حکومت کی خواہش کو تحریک آزادی کے لیے زہر قاتل سمجھتا ہے اور حکومت پاکستان سے مطالبہ کرتا ہے کہ لاکھوں کشمیری شہداء کے خون کو پس پشت ڈال کر محض چند تجارتی فوائد کی خاطر ہندوستان سے تعلقات بحال کرنا اپنے موقف سے بدترین انخراف ہو گا۔ ہندوستانی جیلوں میں قید اور باقی مقامات پرنظر بند رکھے گئے تمام قیدیوں خصوصاً حریت قائدین یاسین ملک،شبیر احمد شاہ،ڈاکٹر قاسم فکتو،آسیہ اندرابی ،عبدالحمید فیاض،مسرت عالم بھٹ،کے ساتھ ہندوستانی حکومت کا غیر انسانی سلوک کی شدید مذمت کرتا ہے اور تمام قیدیوں کی رہائی کے لیے عالمی برادری سے دبائو ڈالنے کا مطالبہ کرتا ہے ۔حکومت پاکستان سے مطالبہ کرتا ہے کہ آزادجموں وکشمیر حکومت کو پوری ریاست کی نمائندہ حکومت تسلیم کرتے ہوئے بین الاقوامی سطح پر اپنا مقدمہ خود پیش کرنے کا موقع فراہم کرے، ایک نائب وزیر خارجہ صرف مسئلہ جموں وکشمیر پر کام کے لیے مقرر کیا جائے اور تمام سفارت خانوں میں جموں وکشمیر ڈیسک قائم اور فعال کیے جائیں۔ صدر آزاد ریاست جموں وکشمیرپر زور دیتا ہے کہ وہ آئینی ذمہ داری کو پورا کرتے ہوئے فوری طور پر مشیر رائے شماری کا تقررکریں جو گشتی سفیر کا کردار ادا کرتے ہوئے عالمی سطح پر حمایت حاصل کرنے کا اہتمام کرے ۔مقبوضہ جموں وکشمیر میں قابض ہندوستانی فورسز کی جانب سے2019ء کے بعد سے مسلسل جاری محاصروں اور تلاشی کی پر تشدد کارروائیوں،گھروں پر چھاپوں اور اس مقصد کے لیے راجوری اور پونچھ میں مزید پیرا ملٹری فورسز کی تعیناتی کی شدید الفاظ میں مذمت کرتا ہے ۔ نیویارک میں ہونے والے او آئی سی کے کشمیر کنٹیکٹ گروپ کے 9نکاتی اعلامیے کی حمایت کرتے ہوئے او آئی سی سے مطالبہ کرتا ہے کہ اس اعلامیے کے مطابق عملی اقدامات کا اہتمام کیا جائے ۔مرکزی مجلس شوریٰ کا یہ اجلاس بین الاقوامی انسانی حقوق کے اداروں اور بین الاقوامی برادری سے اپیل کرتا ہے کہ مقبوضہ جموں وکشمیر میں جاری انسانی حقوق کی خلاف ورزیوں کا نوٹس لے اور مودی حکومت کو مجبور کرے کہ وہ انسانی حقوق کی تنظیموں کو مقبوضہ جموں وکشمیرمیں جانے کی اجازت دے۔اجلاس محسوس کرتا ہے کہ عالمی برادری کی خاموشی سے ہندوستان کے ناپاک عزائم اور ظلم وتشدد کی پالیسی کو تقویت مل رہی ہے جیلوں میں بند حریت قیادت کو شدید خطرہ ہے ۔اجلاس کینیڈا میں سکھ راہنما کے قتل کی مذمت کرتا ہے اور سمجھتا ہے کہ اس کارروائی میں 'را' کے ملوث ہونے کے ناقابل تردید ثبوت سامنے آنے کے بعد مودی سرکار کا مکروہ چہرہ مزید بے نقاب ہوا ہے پاکستان میں بھی تحریک آزادی کشمیر کے کارکنوں کے خلاف اسی طرح کی کارروائیوں اور پاکستان کے اندر دہشت گردی میں ہندوستانی ایجنٹوں کے ملوث ہونے کی صداقت ثابت ہو چکی ہے جس کا بین الاقوامی سطح پر سنجیدہ نوٹس لیا جانا از بس ضروری ہے ۔اجلاس اقوام متحدہ کے فورم پر مسئلہ جموں وکشمیر اٹھانے اور کشمیریوں کے حق خودارادیت کی حمایت پر ترکیہ کے صدر رجب طیب اردگان کا تہہ دل سے شکریہ ادا کرتا ہے اور عالمی فورمز پر ترکیہ کے صدر کی جانب سے تسلسل کے ساتھ حمایت سے کشمیریوں کے لیے حوصلے اور تقویت قراردیتا ہے اور اس امر پر امید کااظہار کرتا ہے کہ دیگر عالمی راہنما بھی ان کی تقلید کریں گے

وزیراعظم آزاد کشمیر کے دائیں بائیں بیٹھے کچھ لوگ ان سے غلط فیصلے کروا رہے ہیں ، زاہد اکرم خان

مظفرآباد (محاسب نیوز) وزیراعظم آزاد کشمیر کے دائیں بائیں بیٹھے کچھ لوگ ان سے غلط فیصلے کروا کر تاجروں کی تحریک جو عام آدمی کے بنیادی حقوق کی تحریک ہے کو غلط رنگ دے کر اپنے مفادات کے لیے غلط فیصلے کروا رہے ہیں جو ایک المیہ ہے، اگر ایسے ہی فیصلے ہوتے رہے تو منگلا کا سوئچ آف ہو سکتا ہے۔ آزاد کشمیر میں افراتفری کا ماحول بن چکا ہے، پڑوسی ملک میڈیا کے ذریعے اس کو بڑھا چڑھا کر پیش کر رہا ہے، ہمارے ووٹ لے کر کچھ نمائندے مراعات لے کر ٹھنڈی گاڑیوں اور آفس تک محدود ہو گئے، کیا حزب اقتدار اور حزب اختلاف دونوں عوام کے بنیادی حقوق کو بھلا کر مراعات کو اہمیت دی انہیں معلوم ہونا چاہیے تحریکیں نئی لیڈر شپ بھی پیدا کرتی ہیں، ان خیالات کا اظہار سینئر قانون دان زاہد اکرم خان ایڈووکیٹ نے اپنے ایک بیان میں کیا۔ انہوں نے کہا کہ وزیراعظم آزاد کشمیر نے واضح کہہ دیا تھا کہ آنے والی نسل کچھ اور مطالبہ کر رہی ہے، وزیراعظم کے دائیں بائیں بیٹھے افراد کوہالہ پار سے آئے ہیں، انہیں نہیں معلوم تیسری نسل مقبوضہ کشمیر میں غلیل سے بھی لڑ رہی ہے اور آزاد کشمیر میں کہاں تک جا سکتی ہے لہٰذا سنجیدگی سے تمام فریقین کو ایک جگہ ماحول بنا کر بٹھایا جائے تاکہ مسائل کا حل تلاش کیا جا سکے، اس سلسلہ میں سنجیدہ قیادت اور سینئر وکلاء کردار ادا کریں، ابھی بھی وقت ہے حالات کو کنٹرول کیا جا سکتا ہے، حالات کنٹرول سے باہر ہو گئے تو پھر نہ پنجاب کانسٹیبلری اور نہ فرنٹیئر کانسٹیبلری ان کو کنٹرول کر سکے گی بلکہ نفرت کا پہلو اجاگر ہو گا جس کا اثر آزاد کشمیر اور گلگت بلتستان میں بھی محسوس ہو گا۔

سائفرکیس ، چیئرمین پی ٹی آئی اور شاہ محمود کونوٹس جاری

عام آدمی تک انتظامی انصاف کی رسائی ہم سب کی اولین ذمہ داری ہے، ڈپٹی کمشنر ندیم جنجوعہ