یونیورسٹی آف بلتستان میں کیریئر کاؤنسلنگ سیمینار کا انعقاد

سکردو (پریس ریلیز) یونیورسٹی آف بلتستان کے شعبہ? ایجوکیشنل ڈیویلپمنٹ کے زیر اہتمام کیریئر کاؤنسلنگ کے موضوع پر ایک سیمینار کامیابی کے ساتھ منعقد ہوا۔ یہ سیمینار رہنمائی اور کاؤنسلنگ پر جاری سلسلے کی ایک کڑی تھا۔ اس سیمینار کا مرکزی عنوان“مستقبل کی تشکیل، کیریئر کے نئے راستوں کی تلاش”تھا، جس میں طلبہ کے روشن مستقبل کے لیے کیریئر آگاہی کی اہمیت کو اجاگر کیا گیا۔تقریب کا آغاز تلاوتِ کلامِ پاک سے ہوا، جس کے بعد ایک پُرسوز نعت نے ماحول کو روح پرور بنا دیا۔ بعد ازاں، پروگرام کی نگران محترمہ کرن نے مہمانِ خصوصی اور شرکاء کو خوش آمدید کہا۔ اپنے خطاب میں انہوں نے اس بات پر زور دیا کہ اس نوعیت کے آگاہی پروگرام طلبہ کو درست اور بروقت کیریئر فیصلوں کی جانب رہنمائی فراہم کرتے ہیں۔مہمانِ خصوصی اور معروف ماہرِ تعلیم و کیریئر کاؤنسلر ڈاکٹر شجاعت میثم نے طلبہ سے نہایت مؤثر اور دلچسپ خطاب کیا۔ انہوں نے حقیقی زندگی کی کامیاب شخصیات کی مثالیں پیش کیں، جدید کیریئر رجحانات پر روشنی ڈالی اور مؤثر کیریئر پلاننگ کے لیے عملی حکمتِ عملیاں بیان کیں۔ ان کا خطاب نہ صرف معلوماتی بلکہ پُراثر بھی ثابت ہوا، جس سے طلبہ کو اپنی سوچ کے دائرے کو وسیع کرنے اور پُراعتماد انداز میں اپنے کیریئر کا انتخاب کرنے کا حوصلہ ملا۔پروگرام کے اختتام پر منتظمین نے شرکاء اور مہمانوں کا شکریہ ادا کیا جبکہ شرکاء میں سرٹیفکیٹس بھی تقسیم کیے گئے۔طلبہ اور اساتذہ نے سیمینار کو نہایت سراہا اور اسے وقت کی ضرورت قرار دیا۔ ان کا کہنا تھا کہ یہ پروگرام یونیورسٹی آف بلتستان کے شعبہ? ایجوکیشنل ڈیویلپمنٹ کے اس مشن سے ہم آہنگ ہے جس کا مقصد طلبہ کو رہنمائی اور کاؤنسلنگ کے ذریعے بااختیار بنانا ہے۔