خیبرپختونخوا حکومت نے پنجاب سے صوبے کو آٹے اور گندم کی بندش پر سپریم کورٹ سے رجوع کرنے کا فیصلہ کرلیا۔
سرکاری ذرائع کے مطابق درخواست میں مؤقف اختیار کیا جائے گا کہ آئین کے آرٹیکل 151 کے تحت کوئی صوبہ غذائی اجناس کی ترسیل پر پابندی نہیں لگا سکتا، گندم اور آٹے کی ترسیل بند ہونے سے صوبے میں آٹے کی قیمت میں اضافہ ہوا ہے۔
صوبائی سیکرٹری فوڈ شاہ محمود خان نے کہا کہ وزیراعلیٰ علی امین گنڈاپور نے گندم، آٹے کے معاملے پرسپریم کورٹ سے رجوع کرنے کی ہدایت کی ہے۔
انہوں نے کہا کہ صوبائی حکومت جلد سپریم کورٹ میں رٹ دائر کرے گی، خیبرپختونخوا کا گندم اور آٹے کا 83 فیصد انحصار پنجاب پر ہے۔
خیال رہےکہ گزشتہ ماہ سے پنجاب سے خیبرپختونخوا میں آٹے اور گندم کی ترسیل پر پابندی عائد ہے جس کے باعث صوبے میں گندم اور آٹے کی قیمتوں میں اضافہ ہوگیا۔ 20 کلوآٹے کے تھیلےکی قیمت 1050 روپے کا اضافہ ہوا اور 20 کلو آٹے کے تھیلے کی قیمت 2200 روپے ہے۔
