سری نگر(کے پی آئی) جنوبی کشمیر میں لاپتہ بھارتی فوجی کی تلاش کے لیے شروع کیے جانے والے فوجی آپریشن میں ایک شہری مارا گیا ہے، مقامی پولیس کے مطابق اسلام آباد کے علاقے کوکر ناگ میں شہری کی لاش ملی ہے اس علاقے میں بدھ کو لاپتہ ہونے والے دوسرے فوجی کمانڈوکی لاش بھی برآمدہوگئی ہے۔ کوکرناگ کے گھنے جنگل کے علاقے گڈول میں بدھ کو تلاشی اور محاصرے کی کارروائی کے دوران بھارتی فوج کے دو پیراکمانڈوز لاپتہ ہو گئے تھے۔جن میں سے ایک کی لاش گزشتہ روز برآمد ہوئی تھی اور دوسرے لاپتہ کمانڈو کی تلاش جاری تھی۔ جمعہ کوگھنے جنگل میں سرچ آپریشن کے دوران دوسرے پیراکمانڈو کی لاش بھی برآمد ہو گئی ہے۔ ہلاک ہونے والے دونوں فوجی کمانڈوز کی شناخت ظاہر نہیں کی گئی ہے۔ فوجی کمانڈوززعلاقے میں گزشتہ ہفتے شروع کئے گئے محاصرے اور تلاشی کی کارروائی میں شامل تھے اوربدھ کے روز انکا ساتھی اہلکاروں سے رابطہ منقطع ہو گیاتھا۔بھارتی فوج کے ایک سینئر افسر نے فوجی کمانڈو زکی ہلاکت کی تصدیق کی ہے۔
