مظفرآباد(محاسب نیوز)پاکستان مسلم لیگ (ن) آزادکشمیر کے سیکرٹری جنرل چوہدری طارق فاروق نے کہا ہے کہ آزادکشمیر میں نظریاتی اور فکری انتشار پیدا کرنے کی کوئی بھی کوشش قومی مفاد میں نہیں ہو سکتی، پاکستان مسلم لیگ ن آزاد جموں کشمیر کسی بھی منفی تحریک یا بیانیہ جس سے قومی مفاد متاثر ہو، قیاس اور انتشار بڑھے اور پاکستان دشمن عناصر کو اس سے فائدہ پہنچے، اس میں شریک نہیں ہو گی، ایسے منفی عناصر کے خلاف جدوجہد کرے گی اور عوامی سطح پر ان کا مقابلہ کرے گی، سوشل میڈیا پر جاری بیان میں چوہدری طارق فاروق کا کہنا تھا کہ آزاد جموں کشمیر میں تاجروں کے پلیٹ فارم ایکشن کمیٹی کو کس کس نے اپنے مقاصد کے لیے استعمال کیا یا کمیٹی دانستہ یا نادانستہ طور پر استعمال ہوئی، یہ ایک طویل بحث ہے۔ آزاد جموں کشمیر میں کس نے جان بوجھ کر غیر جماعتی ماحول بنایا اور سیاسی جماعتوں کو غیر موثر کیا، یہ بات کرنے سے تلخیاں مزید بڑھیں گی۔ اب تاجر کمیٹی اور اس سے منسلک دیگر تنظمیں اپنا بیانیہ بنا چکے ہیں۔ قدرے اپنی تنظیمی حدود سے آگے نکل چکے ہیں۔ عوام سے متعلقہ بجلی کے بلات اور آٹا پر سبسڈی وہ حکومت پاکستان سے لے چکے ہیں۔ اب ان کے چارٹر آف ڈیمانڈ کے کچھ مطالبات کلی طور پر سیاسی، انتظامی اور آئینی نوعیت کے ہیں۔ اس طرح کے مطالبات کا مینڈیٹ انہیں آئندہ عام انتخابات میں حصہ لیکر ہی مل سکتا ہے۔ لہٰذا وہ آئین کے مطابق ایک سیاسی جماعت رجسڑڈ کروا کر ان مطالبات کو اپنے منشور کا حصہ بنائیں اور انتخابات میں عوامی اکثریت سے انہیں حاصل کریں۔ آئے روز آزاد جموں کشمیر میں نظریاتی اور فکری عدم استحکام پیدا نہ کریں۔ پر امن احتجاج سب کا آئینی حق ہے۔ تمبر کے ڈنڈا نما ھتیار کی جگہ وہ پر امن رہنے کو ترجیح دیں۔ گالم گلوچ، سہولت کار اور غیر ریاستی جیسی اصطلاحیں انتشار اور خانہ جنگی جیسی صورت حال پیدا کر سکتی ہیں۔ جس سے ہمارے قومی اتحاد اور اجتماعی مفاد کو نقصان پہنچنے کا احتمال ہے۔ پاکستان مسلم لیگ ن آزاد جموں کشمیر چاہتی ہے کہ ایکشن کمیٹی حکومت آزاد جموں کشمیر اور سیاسی اداروں کے ساتھ بامقصد مذاکرات کر کے عوامی مسائل کو حل کرنے کے لیے اپنا جمہوری کردار ادا کرے۔
