ہٹیاں بالا (بیورورپورٹ) ضلع جہلم ویلی میں خودکشی کی روک تھام، ذہنی آسودگی،خوشحال زندگی کے لیے محکمہ صحت کے زیر اہتمام جامع مہم کا باقائدہ آغاز کردیا گیا،تقریب میں ڈپٹی کمشنر جہلم ویلی بینش جرال،ایس پی جہلم ویلی سید عباس گردیزی،ڈی ایچ او جہلم ویلی ڈاکٹر طاہر رحیم مغل نے شرکت کی،اس مہم کے تحت اساتذہ،طلبہ،طبی عملہ، لیڈی ہیلتھ سپروائزرز،فرنٹ لائن ورکرز،پولیس اہلکاروں کو ذہنی صحت اور کمیونٹی آگاہی کی خصوصی تربیت دی جائے گی،تقریب سے خطاب کرتے ہوئے ڈپٹی کمشنر بینش جرال نے کہا کہ ضلع بھر میں خود کشی جیسے واقعات کی روک تھام کے لیے محکمہ صحت کی مہم قابل تعریف ہیں ہم سب کی ذمہ داری بنتی ہے کہ ہم خود کشی جیسے واقعات کی روک تھام ذہنی آسودگی کے لیے اپنا اپنا کردار ادا کریں،تانکہ ضلع بھر میں آئندہ اس طرح کے واقعات پیش نہ آئیں، ڈسٹرکٹ ہیلتھ آفیسر جہلم ویلی ڈاکٹر طاہر رحیم مغل نے کہا کہ یہ قدم ایک زیادہ خوشحال، باشعور اور صحت مند معاشرے کی جانب اہم پیش رفت ہے،خودکشی کے رحجانات کے تدارک کے لیے تربیتی سیمینار، ورکشاپس منعقد ہوں گی ان پروگراموں میں سکول اساتذہ کو خصوصی تربیت دی جائے گی تاکہ وہ طلبہ کی ذہنی صحت سے متعلق ابتدائی نشانیوں کو پہچان کر بروقت رہنمائی کر سکیں،مقامی کمیونٹی سطح پر بھی آگاہی سیشن منعقد کیے جائیں گے،جبکہ لیڈی ہیلتھ ورکرز کو بھی عملی تربیت فراہم کی جائے گی تاکہ وہ کمیونٹی اور گھریلو سطح پر ذہنی آسودگی کے فروغ میں موثر کردار ادا کر سکیں،ڈی ایچ او جہلم ویلی ڈاکٹر طاہر رحیم مغل کے مطابق محکمہ صحت اس سلسلے میں مزید موثر اقدامات بھی متعارف کروا رہا ہے، جن کے ذریعے ذہنی صحت سے متعلق مسائل کی جلد تشخیص اور رہنمائی ممکن ہو سکے گی،یہ سرگرمیاں نہ صرف موجودہ چیلنجز کے مقابلے میں مددگار ثابت ہوں گی بلکہ انہیں پرائمری ہیلتھ کیئر کا مستقل حصہ بنا کر ایک پائیدار نظام بھی تشکیل دیا جائے گا، جس سے ضلع بھر میں ذہنی آسودگی کو فروغ ملے گا۔
