اسلام آباد (بیورورپورٹ)آزاد جموں و کشمیر کے وزیراعظم فیصل ممتاز راٹھور سے کل جماعتی حریت کانفرنس کے وفد نے کنوینیئر غلام محمد صفی کی قیادت میں جموں کشمیر ہاؤس میں ملاقات کی۔ وفد میں سید فیض نقشبندی، محمود احمد ساغر، ایڈووکیٹ پرویز شاہ، مشتاق احمد بٹ، شیخ عبدالمتین، اعجاز رحمانی، امتیاز احمد وانی، حاجی محمد سلطان، شیخ عبدالماجد اور راجہ شاہین شامل تھے۔وفد نے وزیراعظم فیصل ممتاز راٹھور کو منصب سنبھالنے پر مبارکباد دی۔ ملاقات کے دوران مسئلہ کشمیر کو بین الاقوامی سطح پر اجاگر کرنے، مقبوضہ جموں و کشمیر کی تازہ صورتحال، اور کشمیریوں کے حق خود ارادیت کی تحریک کے حوالے سے تفصیلی تبادلہ خیال کیا گیا۔وزیراعظم فیصل ممتاز راٹھور نے کہا کہ آزاد کشمیر کی موجودہ حکومت کی اولین ترجیح مسئلہ کشمیر کو اس کے حقیقی تناظر میں اجاگر کرنا ہے اور اس حوالے سے حریت کانفرنس کے ساتھ مل کر مشترکہ حکمت عملی وضع کی جائے گی۔ انہوں نے کہا کہ آزاد کشمیر کی حکومت اور عوام ہمیشہ مقبوضہ کشمیر کے بھائیوں اور بہنوں کے ساتھ کھڑے ہیں۔وزیراعظم نے مزید کہا کہ شہید ذوالفقار علی بھٹو نے پیپلز پارٹی کی بنیاد مسئلہ کشمیر پر رکھی اور کشمیر پر ایک ہزار سال تک جنگ کا آفاقی نظریہ دیا۔ شہید جمہوریت محترمہ بے نظیر بھٹو نے حریت کانفرنس کے قائدین کو عالمی سطح پر متعارف کروایا اور بطور وزیراعظم پاکستان مختلف عالمی فورمز پر مسئلہ کشمیر کو بھرپور انداز میں اجاگر کرتی رہیں۔انہوں نے کہا کہ صدر آصف علی زرداری نے ہر عالمی فورم پر کشمیریوں کے حق خود ارادیت کے لیے آواز بلند کی اور چیئرمین بلاول بھٹو زرداری نے بطور وزیر خارجہ عالمی فورمز پر مسئلہ کشمیر کو اجاگر کیا اور دنیا پر زور دیا کہ وہ کشمیریوں کو ان کا حق خود ارادیت دلوانے میں اپنا کردار ادا کرے۔وزیراعظم نے یقین دلایا کہ ان کی حکومت مسئلہ کشمیر کو ہر عالمی فورم پر مؤثر طریقے سے اجاگر کرتی رہے گی اور عالمی سطح پر مسئلہ کشمیر کی وکالت کے لیے ایک متفقہ اور بھرپور حکمت عملی اپنائی جائے گی۔انہوں نے کہا کہ مقبوضہ کشمیر میں بھارتی قابض افواج کی جانب سے انسانی حقوق کی سنگین خلاف ورزیوں پر شدید تشویش ہے اور بین الاقوامی برادری کو اقوام متحدہ کی قراردادوں کے مطابق کشمیریوں کو ان کا حق خود ارادیت دلوانے کے لیے اپنا اہم کردار ادا کرنا چاہیے۔وزیراعظم نے بھارتی جیلوں میں قید حریت رہنماؤں اور مقبوضہ کشمیر کے عوام کی بے مثال جدوجہد پر خراج تحسین پیش کیا اور اس عزم کا اظہار کیا کہ کشمیر کی آزادی کی تحریک کو اس کے منطقی انجام تک پہنچانے کے لیے تمام کشمیری اسٹیک ہولڈرز باہمی مشاورت اور مکمل ہم آہنگی سے کام جاری رکھیں گے تاکہ مقبوضہ کشمیر کی جلد آزادی کو یقینی بنایا جا سکے۔وفد نے وزیراعظم کا شکریہ ادا کیا اور انہیں اپنے بھرپور تعاون کا یقین دلایا۔
