عمران خان کو زائد عمر اور بشریٰ بی بی کو خاتون ہونے کی وجہ سے کم سزا سنائی گئی، توشہ خانہ ٹو کا تحریری فیصلہ

سابق وزیراعظم عمران خان اور ان کی اہلیہ بشریٰ بی بی کے خلاف توشہ خانہ ٹو کیس کا تحریری فیصلہ بھی سامنے آگیا۔
اسپیشل جج سینٹرل ارجمند شاہ نے توشہ خانہ ٹو کیس میں عمران خان اور بشریٰ بی بی کو مجموعی طور پر 17، 17 سال قید اور ایک کروڑ 64 لاکھ روپے جرمانے کی سز اسنائی ہے۔
توشہ خانہ ٹو کیس کے تحریری فیصلے میں کہا گیا ہے کہ استغاثہ اپنا مقدمہ ثابت کرنے میں کامیاب رہا اور دونوں ملزمان خیانت مجرمانہ کے مرتکب پائے گئے، دونوں ملزمان پر پر جرم ثابت ہوا ہے۔
توشہ خانہ ٹو کیس: عمران اور بشریٰ بی بی کو 17، 17 سال قید کی سزا، 1کروڑ 64 لاکھ روپے جرمانہ بھی عائد
عدالت کے تحریری فیصلے میں لکھا ہے کہ بانی پی ٹی آئی عمران خان کو جرم ثابت ہونے پر دفعہ 409 کے تحت 10 سال سزا سنائی گئی جبکہ انسداد رشوت ستانی ایکٹ کے تحت انہیں 7 سال قید کی سزا سنائی گئی۔
تحریری فیصلے میں ہے کہ بشریٰ بی بی کو بھی 17 سال قید کی سزا گئی جبکہ مجرمان کو فی کس 1 کروڑ 64 لاکھ 25 ہزار 650 روپے جرمانہ عائد ہوا، جرمانے کی عدم ادائیگی پر مزید 6، 6 ماہ قید کی سزا ہوگی۔
عدالت کے فیصلے میں ہے کہ بانی پی ٹی آئی کی زائد عمر اور بشریٰ بی بی کے خاتون ہونے کی وجہ سے کم سے کم سزا دی گئی، مجرموں کی عرصہ حوالات کو بھی سزا میں شامل کر لیا گیا ہے۔