سری نگر(کے پی آئی) مقبوضہ جموں و کشمیر میں ہائی کورٹ نے پولیس کو کالے قانون پبلک سیفٹی ایکٹ کے تحت گرفتار ڈوڈہ کے ایم ایل اے معراج ملک کے خلاف چارج شیٹ دائر کرنے سے روک دیا ہے اورمزید تحقیقات کی ہدایت کی ہے۔ معراج ملک کے خلاف دانستہ حملے، سرکاری ملازم کو کام سے روکنے اور دیگر دفعات کے تحت دائر مقدمے کی سماعت ہائی کورٹ کے جج جسٹس راجیش سیکھری نے کی۔عدالت نے فریقین کو نوٹس جاری کرتے ہوئے مقدمے کی سماعت 31اکتوبر تک ملتوی کر دی۔ اس سے قبل، ڈوڈہ کی ضلعی انتظامیہ نے معراج ملک کے خلاف ایک ڈوزیئر تیار کیا تھا، جس میں دعوی کیا گیا تھا کہ ایم ایل اے نے مبینہ طور پر فرقہ وارانہ اور علاقائی تقسیم پیدا کرنے کی غرض سیآپریشن سندور کے دوران سرکاری اہلکاروں کو دھمکایا تھا۔ڈوزیئر میں معراج ملک کو عادی مجرم بھی قرار دیا گیاہے۔
