حالیہ سیلاب میں جاں بحق ہونے والوں کے لواحقین کو 8لاکھ معاوضہ دیا جائے گا،وزیر اعلیٰ

گلگت(محاسب نیوز)وزیر اعلیٰ گلگت بلتستان حاجی گلبر خان نے حالیہ سیلاب سے ہونے والے نقصانات اور جاں بحق افراد کے لواحقین اور تباہ ہونے والے مکانات کے معاوضوں کی ادائیگی کے حوالے سے منعقدہ اعلیٰ اجلاس کے موقع پر گفتگو کرتے ہوئے کہا کہ مہنگائی کے اس دور میں سیلاب سے تباہ ہونے والے مکانات کا معاوضہ صرف ایک لاکھ ادا کرنا ناکافی ہے اس رقم میں ایک کمرہ بھی تعمیر نہیں کیا جاسکتا۔ سیلاب متاثرین کی ہرممکن مدد اور ان کے زخموں پر مرہم رکھنا ہماری ذمہ داری ہے جس کو مدنظر رکھتے ہوئے فیصلہ کیا گیا ہے کہ مکمل تباہ ہونے والے مکانات کامعاوضہ 3لاکھ اور جزوی نقصان پہنچنے والے مکانات کا معاوضہ ڈیڑھ لاکھ دیا جائے گا اس کے علاوہ سابقہ پالیسی میں گھر کے سربراہ کی قدرتی آفت یا سیلاب میں موت ہونے کی صورت میں 8لاکھ معاوضہ ادا کیا جاتا تھا جبکہ سربراہ کے علاوہ دیگر افرادکا قدرتی آفت یا سیلاب میں جاں بحق ہونے پر صرف 6 لاکھ معاوضہ مقرر کیا گیا تھا جس پر نظر ثانی کرتے ہوئے فیصلہ کیا گیا ہے کہ حالیہ سیلاب میں تمام جاں بحق ہونے والوں کے لواحقین کو 8لاکھ معاوضہ ادا کیا جائے گا جس کیلئے سفارشات کابینہ اجلاس میں پیش کرنے کے احکامات دیئے گئے ہیں۔ صوبائی حکومت کی ترجیح ہے کہ سردیوں کے آمد سے قبل جن کے مکانات تباہ ہوئے ہیں ان کی رہائش کیلئے بندوبست کیا جائے۔ وزیر اعلیٰ نے اس موقع پر صوبائی سیکریٹری داخلہ اور ڈائریکٹر جنرل جی بی ڈی ایم اے کو ہدایت کی کہ سیلاب متاثرین جن کے مکانات تباہ ہوئے ہیں ان کو جلد معاوضوں کی ادائیگی کو یقینی بنائیں۔ وزیر اعلیٰ نے اس موقع پر کہا کہ صوبائی حکومت کی بہترین اور قبل از وقت حکمت عملی تیار کرنے کی وجہ سے حالیہ سیلاب میں ریسکیو اور بحالی کے کام احسن انداز میں جاری ہیں۔ بنیادی سہولیات کی فراہمی کیلئے ایمرجنسی کے تحت کئی علاقوں میں منصوبے مکمل کئے گئے ہیں اور بڑے منصوبوں پر کام جاری ہے۔محکمہ پلاننگ نے مکمل بحالی کیلئے وفاقی حکومت کو 4ارب کے علاوہ مزید 15 ارب روپے کے تفصیلات اور سفارشات ارسال کئے ہیں۔