راولپنڈی (صباح نیوز)خیبرپختونخوا کے ضلع بنوں میں سیکورٹی فورسز اور قانون نافذ کرنے والے اداروں نے انٹیلی جنس بنیاد پر مشترکہ آپریشن کے دوران 8 دہشتگرد ہلاک کردیے۔ آئی ایس پی آر کے مطابق بنوں میں سیکیورٹی فورسز نیدہشت گردوں کے ٹھکانوں کو مؤثر طریقے سے نشانہ بنایا جب کہ شدید فائرنگ کے تبادلے میں 8 دہشت گرد ہلاک کردیے۔ آئی ایس پی آر کے مطابق ہلاک ہونے والے دہشت گردوں کے قبضے سے اسلحہ اور گولہ بارود بھی برآمد کرلیا گیا،یہ دہشت گرد سیکیورٹی فورسز، قانون نافذ کرنے والے اداروں کے خلاف متعدد دہشت گردانہ کارروائیوں اور بے گناہ شہریوں کی ٹارگٹ کلنگ میں ملوث تھے۔ آئی ایس پی آر کے مطابق یہ آپریشن سیکیورٹی فورسز اور قانون نافذ کرنے والے اداروں کے مضبوط اور مربوط تعاون کی عکاسی کرتا ہے۔حالیہ عرصے میں علاقے میں انٹیلیجنس کی بنیاد پر کارروائیوں میں نمایاں اضافہ ہوا ہے، ہم آہنگ اور مربوط سیکیورٹی اقدامات دہشت گردوں کی عملی نقل و حرکت کو محدود کرنے کیلئے ترتیب دیئے گئے ہیں۔ آئی ایس پی آر کے مطابق دہشت گردوں کے سہولت کار نیٹ ورکس کو منظم انداز میں تباہ کرنے اور ان کی دوبارہ تنظیم کی صلاحیت کو کم کرنے کیلئے سیکیورٹ اقدامات کئے جارہے ہیں
