مظفرآباد
پاک بحریہ کا زمین سے فضاء میں مار کرنے والے میزائل کا کامیاب تجربہ
راولپنڈی (صباح نیوز)آئی ایس پی آر کے مطابق پاک بحریہ نے شمالی بحیرہءِعرب میں ایک جامع مشق کے ذریعے اپنی آپریشنل تیاری اور جنگی صلاحیتوں کا شاندار مظاہرہ کیا۔ مشق میں بدلتی ہوئی بحری جنگی حکمتِ عملی کے مطابق روایتی اور بغیر پائلٹ نظاموں کی مؤثر کارکردگی پیش کی گئی۔ مشق کے دوران عمودی لانچنگ سسٹم کے ذریعے LY-80(N) زمین سے فضا میں مار کرنے والے میزائل کا توسیعی فاصلے پر کامیاب لائیو فائر کیا گیا، جس سے پاک بحریہ کے جدید فضائی دفاعی نظاموں کی طویل فاصلے تک مؤثر صلاحیت کی تصدیق ہوئی۔ میزائل نے ایک فضائی ہدف کو کامیابی سے نشانہ بنا کر تباہ کیا۔ اس کے علاوہ مشق میں لوئٹرنگ میونیشن کے ذریعے سطحی اہداف کو کامیابی سے نشانہ بنایا گیا، جس سے پاک بحریہ کی درست نشانہ لگانے کی صلاحیت واضح ہوئی۔ لوئٹرنگ میونیشن نے سطحی اہداف کو مؤثر انداز میں تباہ کیا، جو جدید بحری جنگ میں اس کی اہمیت کا ثبوت ہے۔ مشق کے دوران بغیر پائلٹ سطحی جہاز (یو ایس وی) کے کامیاب اوپن سی ٹرائلز بھی کیے گئے، جو خودکار بحری ٹیکنالوجی میں ایک اہم پیش رفت قرار دیے جا رہے ہیں۔ ان آزمائشوں میں یو ایس وی کی تیز رفتاری، انتہائی پھرتی، درست نیویگیشن اور خراب موسم میں کارکردگی سمیت مشن کے لیے درکار مضبوطی کا کامیاب مظاہرہ کیا گیا۔ یو ایس وی کو کم خطرے اور زیادہ اثر رکھنے والا جدید ٹیکٹیکل پلیٹ فارم قرار دیا گیا۔ کمانڈر پاکستان فلیٹ نے مشق کا مشاہدہ کیا، جس میں پاک بحریہ کی جدید نظاموں کو مؤثر انداز میں استعمال کرنے کی صلاحیت نمایاں ہوئی۔ نیول چیف ایڈمرل نوید اشرف، نشانِ امتیاز (ملٹری)، نے پاک بحریہ کے افسران اور جوانوں کی پیشہ ورانہ مہارت اور آپریشنل قابلیت کو سراہا۔ انہوں نے اس عزم کا اعادہ کیا کہ پاک بحریہ ہر حالت میں پاکستان کے سمندری دفاع اور قومی بحری مفادات کے تحفظ کو یقینی بنائے گی۔
