مظفرآباد (سپیشل رپورٹر) پاکستان پیپلز پارٹی کے نائب صدر، سابق ایڈمنسٹریٹر میونسپل کارپوریشن اور امیدوار اسمبلی حلقہ 3 سٹی مظفرآباد سردار مبارک حیدر نے یومِ شہدائے جموں کے موقع پر اپنے ایک خصوصی بیان میں کہا ہے کہ 6 نومبر 1947 ریاست جموں و کشمیر کی تاریخ کا وہ سیاہ ترین دن ہے جب لاکھوں نہتے مسلمانوں کو اسلام اور پاکستان سے محبت کے جرم میں بے دردی سے شہید کیا گیا۔ انہوں نے کہا کہ یہ دن کشمیری قوم کے لیے محض ایک تاریخی یاد نہیں بلکہ قربانی، عزم اور استقلال کی علامت ہے، جو ہمیں اپنی آزادی کی جدوجہد کو جاری رکھنے کا درس دیتا ہے۔انہوں نے کہا کہ جموں کے مسلمانوں نے اس وقت بے مثال قربانیاں پیش کیں جب ان کے پاس نہ کوئی ہتھیار تھا اور نہ کوئی دفاعی قوت، مگر ایمان، یقین اور پاکستان سے والہانہ محبت نے انہیں استقامت بخشی۔ سردار مبارک حیدر نے کہا کہ شہدائے جموں نے اپنے خون سے تحریکِ آزادی کشمیر کی بنیاد مضبوط کی اور ان کی قربانیاں آج بھی کشمیریوں کے لیے مشعلِ راہ ہیں۔پیپلز پارٹی رہنما سردار مبارک حیدر نے کہا کہ یومِ شہدائے جموں ہمیں اس بات کا احساس دلاتا ہے کہ کشمیری عوام نے کبھی بھی ظلم و جبر کے آگے سر نہیں جھکایا۔ انہوں نے کہا کہ آج مقبوضہ کشمیر میں بھارتی قابض فوج کی ریاستی دہشتگردی، ماورائے عدالت قتل، جبری گمشدگیاں اور انسانی حقوق کی سنگین پامالیاں اس بات کا تسلسل ہیں کہ کشمیری عوام اپنی آزادی کے لیے کتنی بڑی قربانیاں دے رہے ہیں۔سردار مبارک حیدر نے کہا کہ عالمی برادری، بالخصوص اقوامِ متحدہ اور اسلامی ممالک کی تنظیم (OIC)، کو اب خاموشی توڑ کر کشمیریوں کے حقِ خودارادیت کے حصول کے لیے عملی اقدامات اٹھانے چاہئیں۔ انہوں نے کہا کہ وقت آ گیا ہے کہ دنیا بھارت کو اس کے جنگی جرائم پر جوابدہ ٹھہرائے اور جنوبی ایشیا میں پائیدار امن کے لیے مسئلہ کشمیر کو اقوامِ متحدہ کی قراردادوں کے مطابق حل کیا جائے۔آخر میں سردار مبارک حیدر نے عزمِ نو کا اظہار کرتے ہوئے کہا کہ پاکستان پیپلز پارٹی شہدائے جموں کی قربانیوں کو سلامِ عقیدت پیش کرتی ہے اور کشمیری عوام کے ساتھ مکمل یکجہتی کا اظہار کرتی ہے۔ انہوں نے کہا کہ شہداء کے مشن کی تکمیل ہماری قومی اور اخلاقی ذمہ داری ہے، اور ہم اس جدوجہد کو اُس وقت تک جاری رکھیں گے جب تک ریاست جموں و کشمیر کے عوام کو آزادی اور حقِ خودارادیت نہیں مل جاتا۔
