تحریک عدم اعتماد پر رائے شماری آج،انوار سرکار کا سورج غروب‘فیصل ممتازراٹھور کا40ارکان کی حمائت کادعویٰ
مظفرآباد(محاسب نیوز)آزادکشمیر میں نئی حکومت کی تشکیل اور موجودہ وزیراعظم کے خلاف تحریک عدم اعتماد پر رائے شماری کیلئے قانون ساز اسمبلی کا اجلاس آج سہ پہر تین بجے منعقد ہوگا، اجلاس کی صدارت سپیکر قانون ساز اسمبلی چوہدری لطیف اکبر کریں گے، پاکستان پیپلزپارٹی آزادکشمیر کی جانب سے وزیراعظم چوہدری انوارالحق کے خلاف پیش کی گئی تحریک عدم اعتماد پر بحث اور رائے شماری ہو گی، ذرائع کے مطابق وزیراعظم چوہدری انوارالحق وزارت عظمیٰ کے منصب سے استعفیٰ دینے کیلئے مشاورت کر رہے ہیں،ان کے استعفیٰ کی صورت میں طلب کردہ اجلاس میں نئے وزیراعظم کا انتخاب عمل میں لایا جائے گا، نئے وزیراعظم کے انتخاب اور حکومت سازی کیلئے جملہ انتظامات مکمل ہیں، پاکستان پیپلزپارٹی نے نئے وزیراعظم کیلئے فیصل ممتاز راٹھور کونامزد کردیا ہے، نئے وزیراعظم کے انتخاب کے بعد حلف برداری کی تقریب منعقد ہو گی، جب کہ نئی کابینہ کی تشکیل بھی فوری طور پر متوقع ہے، ابتدائی طورپر 16 وزیر،2مشیر اور دو معاون خصوصی مقرر کیے جائیں گی، 16وزراء پر مشتمل باضابطہ طورپر حلف اٹھائے گی، وزیراعظم اور وزراء تقریب حلف برداری ایوان صدر میں منعقد ہو گی۔متوقع وزراء پاکستان پیپلزپارٹی کے صدر چوہدری یاسین کے بیٹے عامر یاسین کو وزارت لوکل گورنمنٹ سونپے جانے کی مبینہ اطلاعات ہیں، دیگر وزراء میں میاں وحید، جاوید ایوب، چوہدری رشید، چوہدری ارشد، یاسر سلطان، جاوید بڈھانوی، ملک ظفر، چوہدری اخلاق، قاسم مجید، بازل نقوی، نبیلہ ایوب، دیوان چغتائی، سردار محمد حسین، فہیم ربانی، ضیاء القمر اور رفیق نیئر کے نام شامل ہیں جبکہ عبدالماجد خان اور چوہدری اکبر ابراہیم کے کابینہ میں شامل ہونے کے حوالے سے مشاورت جاری ہے۔مسلم لیگ (ن) کے صدر شاہ غلام قادر نئے قائد حزب اختلاف ہوں گے، چوہدری انوارالحق اور ان کا گروپ حکومت کا ساتھ دے گا یااپوزیشن بنچوں پر بیٹھے گا فیصلہ جلد متوقع ہے۔
