سردار میر اکبر خان مسلم لیگ ن میں شامل،کشمیر ی عوام نے مینڈیٹ دیا تو مسلم لیگ ن نے مایوس نہیں کرے گی، انجینئر امیر مقام

اسلام آباد(صباح نیوز)آزادکشمیر کے سابق وزیر اور پاکستان تحریک انصاف فارورڈ بلاک کے رکن قانون ساز اسمبلی سردار میر اکبر خان مسلم لیگ ن میں شامل ہو گئے۔ وفاقی وزیر انجینئر امیر مقام کی آزاد کشمیر کے لیگی رہنماؤں کے ہمراہ پریس کانفرنس میں حلقہ شرقی باغ سے رکن اسمبلی سردار میر اکبر نے مسلم لیگ ن میں شمولیت کا اعلان کردیا۔ سردار میر اکبر نے کہا کہ باغ میں مرکزی قیادت کا ایک بڑا جلسہ منعقد کریں گے، آج مسلم لیگ ن میں باضابطہ شمولیت اختیار کرتا ہوں، تمام پرانے ساتھیوں کا شکر یہ ادا کرتا ہوں، ہمارا تعلق آج کا نہیں، 30 سے 35 سال پرانا کا ہے۔ وفاقی وزیر امور کشمیر امیر مقام نے کہا کہ پارٹی اور قیادت کی طرف سے سردار میر اکبر کو خوش آمدید کہتے ہیں، کشمیر کے عوام نے مینڈیٹ دیا تو مسلم لیگ ن نے مایوس نہیں کرے گی، کشمیری بغیر تنخواہ کے پاکستان کے محافظ ہیں، کشمیری کئی سال سے بھارت کیخلاف جدوجہد میں مصروف ہیں۔ انجینئر امیر مقام نے کہا کہ ماضی میں جو ہوا وہ گزر گیا، اب ہم ایک ہیں، ہمارا قائد نواز شریف ہے،کشمیر کا مسئلہ ہماری اولین ترجیح ہے، کشمیر کی عوام کو کبھی مایوس نہیں کریں گے، کشمیری پاکستان کی نظریاتی سرحدوں کے محافظ ہیں، فرنٹ لائن پر ڈٹے ہوئے ہیں۔امیر مقام نے کہا کہ کشمیر کا مقدمہ معرکہ حق کے بعد پہلی بار دنیا پر واضح ہوا ہے۔انہوں نے کہا کہ آزاد کشمیر میں مسلم لیگ ن کو مضبوط اور منظم دیکھ کر خوشی ہوئی ہے۔ انجینئر امیر مقام نے بھارت کی آبی جارحیت کی شدید مذمت کرتے ہوئے کہا ہے کہ پاکستان آخری حد تک جانے کیلئے تیار ہے، کشمیری پاکستان کی نظریاتی سرحدوں کے محافظ ہیں، آزاد کشمیر میں مسلم لیگ ن کو مضبوط اور منظم دیکھ کر خوشی ہوئی ہے۔ صدر مسلم لیگ ن آزاد کشمیر شاہ غلام قادر نے کہا کہ مختلف حلقوں میں ساتھیوں کو واپس گھر لارہے ہیں، کچھ لوگوں نے مختلف وجوہات پر ساتھ چھوڑا تھا،انھیں ساتھ لا رہے ہیں، آج سردار میر اکبر مسلم لیگ ن میں شامل ہورہے ہیں، خوش آمدید کہتے ہیں۔ اس موقع پر راجہ فاروق حیدر نے کہا کہ سردار میر اکبر کو مسلم لیگ ن میں خوش آمدید کہتے ہیں، میر اکبر خان کی شمولیت سے ضلع باغ میں جماعت مضبوط ہوگی، آئندہ انتخابات میں آزاد کشمیر میں مسلم لیگ ن کی حکومت ہوگی۔ راجا مشتاق احمد منہاس نے اظہار خیال کرتے ہوئے کہا کہ پارٹیوں میں آنا جانا لگا رہتا ہے۔ اچھے اور برے وقت بھی آتے ہیں، تاہم پارٹی کے ساتھ وابستگی شک و شبہے سے بالا تر رہنی چاہیے۔ سردار میر اکبر خان نے 2016 کے عام انتخابات سے قبل مسلم لیگ ن میں شمولیت اختیار کی تھی، تاہم 2021 کے انتخابات سے قبل وہ پاکستان تحریکِ انصاف میں شامل ہو گئے تھے۔ اب وہ دوبارہ مسلم لیگ ن میں واپس آ گئے ہیں۔حلقہ شرقی باغ میں اب سردار میر اکبر کا مقابلہ اب پیپلز پارٹی کے امیدوار سردار ضیاالقمر سے ہوگا، جو سابق سینئر وزیر سردار قمرالزمان کے فرزند ہیں۔ دلچسپ بات یہ ہے کہ سردار میر اکبر نے 2021 کے عام انتخابات میں پیپلز پارٹی کے سردار قمرالزمان کو شکست دی تھی۔