بٹگرام (بیورو رپورٹ)کمشنر ہزارہ ڈویڑن فیاض علی شاہ کی سربراہی میں تیسرے روزہ اہداف کا جائزہ لینے کے لئے گزشتہ روز شام 05:30 کو ضلع بٹگرام میں اجلاس کا انعقاد کیا گیا۔ اجلاس میں ڈپٹی کمشنر بٹگرام، ایڈیشنل ڈپٹی کمشنر بٹگرام، ڈسٹرکٹ ہیلتھ آفسر بٹگرام، محکمہ تعلیم، محکمہ پولیس سمیت محکمہ صحت کے دیگر افسران نے شرکت کی۔دوران اجلاس پولیو فوکل پرسن کی جانب سے کمشنر ہزارہ اور ڈپٹی کمشنر بٹگرام کے ساتھ ساتھ اجلاس کے شرکاءکو پولیو مہم کے تیسرے د ن کے اہداف کے حصول پر تفصیلی بریفنگ دی گئی۔ کمشنر ہزارہ نے اجلاس کے شرکائ کو پولیو مہم کی کامیابی کے لئے سب کو ایک ٹیم ہو کر کام کرنے پر سراہا۔ کامیاب آگاہی مہم کے بدولت انکاری والدین کی شرح میں واضح کمی آئے گی اور اگر یہی صورتحال رہی تو ضلع بٹگرام سمیت پورے ملک کو پولیو مرض سے پاک کیا جائے گا۔ کمشنر ہزارہ کا مزید کہنا تھا کہ انکاری والدین کی شرح کو کم کرنے کے لئے انکاری والدین کی تمام شکوک و شبہات کو دلائل سے دور کیا جائے تاکہ کوئی بھی بچہ حفاظتی قطروں سے محروم نہ رہے۔ضلع بٹگرام میں پولیو مہم کی کامیابی کے لیئے 442 پولیو ٹیمیں تشکیل دے دی گئی ہیں جو گھر گھر جا کر گھروں میں 94136 سے زائد بچوں کو پولیو سے بچاو کے ویکسین پلائینگی۔ پولیو ٹیموں کی مانیٹرنگ کے لیئے 119 ایریا سپروائزر بھی تعینات کئے گئے ہیں جبکہ پولیو ٹیموں کی سیکیورٹی کے لئے 465 پولیس اہلکاروں کو تعینات کیا گیا ہے۔
