1500سالہ جشن ِعیدمیلادالنبیﷺ‘عاشقان رسول کے روح پرورجلوس‘مرحبا یا مصطفےٰﷺ کے نعروں سے فضا معطر
مظفرآباد (خبرنگارخصوصی/جہانگیر حسین اعوان) پوری دنیا کی طرح آزاد کشمیر بھر میں جشن ِ عید میلاد النبی صلی اللہ تعالیٰ علیہ وآلہ واصحابہ وبارک وسلم کی جلوس و محافل کا انعقاد کیا گیا۔ آزاد کشمیر کے دارالحکومت مظفرآباد میں مرکزی سیرت کمیٹی مظفرآباد کے زیر اہتمام 12 ربیع الاول کی بابرکت تقریبات منعقد کی گئی۔ 12 ربیع الاول کی صبح جشنِ صبح بہاراں اور پرچم کشائی کی پُروقار تقریب سے ہوئی۔ فضا درود و سلام اور نعرہ? رسالت ﷺ سے گونجتی رہی، عاشقانِ رسول ﷺ شہر بھر سے بڑی تعداد میں شریک ہوئے۔ صدر مرکزی سیرت کمیٹی عتیق احمد رضا، سالارِ اعلیٰ صاحبزادہ عتیق احمد جھاگوی، جنرل سیکرٹری خرم شہزاد چوہدری، ڈپٹی کمشنر مظفرآباد، ڈی ایس پی مظفرآباد، نذیر احمد ماکنوں، ندیر احمد شیخ، حافظ عبد الوحید اعوان سمیت علمائے کرام، مشائخ عظام اور مختلف طبقاتِ زندگی سے تعلق رکھنے والے معزز شخصیات تقریب میں شرکت کی۔ مرکزی سیرت کمیٹی سیکیورٹی اسکواڈ اور شہری دفاع کے رضاکاروں کے دستوں نے پرچم کو سلامی پیش کی، جس نے فضا کو ایمان افروز مناظر سے روشن کر دیا۔ پرچم کشائی کے بعد 10 بجے صبح دربار عالیہ سائیں سخی سہیلی سرکار میں 12 ربیع الاول کی مناسبت سے ابتدائی نشست منعقد ہوئی۔ اس روحانی محفل میں نعتیہ کلام اور درود و سلام کی صدائیں بلند ہوئیں اور علماء و مشائخ جن میں پیر بدر الاسلام، برمالہ شریف، صاحبزادہ جاوید منان قریشی، میاں محمد رفیق جھاگوی، صاحبزادہ کوکب سلیم چشتی، علامہ منظور احمد قادری، مولانا حسن حقانی، علامہ منصور اختر، علامہ آفتاب نور، مفتی عبد الروف نظامی، نذیر احمد کیانی خلفیہ مجاز موہڑہ شریف نے ولادتِ باسعادت کی اہمیت پر روشنی ڈالی اور آقا کریم صلی اللہ تعالیٰ علیہ وآلہ واصحابہ وبارک وسلم کی بارگاہ میں گلہائے عقیدت پیش کی۔تقریب سے چیئرمین مرکزی انجمن تاجران مظفرآباد شوکت نواز میر نے بھی خطاب کیا۔ اس کے بعد مرکزی جلوس کا باقاعدہ آغاز کیا گیا۔ جس کی قیادت صدر مرکزی سیرت کمیٹی مظفرآباد عتیق احمد کیانی، مشائخ عظام اور عمائدین شہر نے کی۔ جلوس میں وزیر حکومت چوہدری محمد رشید، میئر بلدیہ سید سکندر گیلانی، صاحبزادہ جاوید منان قریشی، صاحبزادہ میاں محمد رفیق جھاگوی، میاں محمد عتیق جھاگوی، صاحبزادہ معظم علی برق، شوکت نواز میر، خرم شہزاد چوہدری، سردار مبارک حیدر، علامہ میاں محمد بشیر نقشبندی، میجر(ر) قاضی شبیر احمد، سید جنید رضا عطاری، صاحبزادہ کامران علی قادری، چوہدری توفیق احمد ایڈووکیٹ، سید مظہر گیلانی ایڈووکیٹ، شیخ اظہر، شیخ نذیر احمد، خواجہ نذیر احمد، امجد سلیمان اعوان، حافظ عبد الوحید اعوان، قاضی سہیل احمد، فیصل جمیل کاشمیری، یاسر سفیر مغل ایڈووکیٹ، ہارون آزاد، شیخ مقصود احمد، خواجہ عقیل احمد، محمد حسنین مصطفائی، خواجہ حسان احمد ایڈووکیٹ، خواجہ فاروق احمد سمیت عاشقان رسول کی کثیر تعداد میں شرکت کی۔جلوس کا منظر نہایت دلکش اور دیدنی تھا۔ جلوس کے شروع مدارس کے طلبہ نے ہاتھوں میں پھولوں کے گلدستے اٹھائے حضور پر نور علیہ الصلٰوۃ والسلام سے محبت و عقیدت کا اظہار کیا۔ جابجا نصب سبز پرچم، عقیدت سے لبریز نعرے اور درود و سلام کی صدائیں، مظفرآباد کی فضا کو معطر کر رہی تھیں۔ جلوس شاہ سلطان برج، بنک روڈ اور سی ایم ایچ روڈ سے گزرتا ہوا ایک بڑے عوامی اجتماع کی شکل میں یونیورسٹی کالج گراؤنڈ میں پہنچا، جہاں قومی سیرت کانفرنس کا انعقاد کیا گیا۔ مرکزی انجمن تاجران مظفرآباد، انجمن تاجران مدینہ مارکیٹ اور دیگر تنظیمات اور عاشقان مصطفٰی نے جگہ جگہ میلاد النبی کے جلوس کا استقبال کیا اور اہل محبت کی جانب پانی اور نیاز سے شرکاء جلوس کی خدمت کی۔ امسال 15 سو جشنِ ولادت کی خوشی میں مظفرآباد کے نواحی علاقوں نوسیری نوسدہ، بلگراں، پنجگراں، کنور شریف، باڑیاں، نیاز پورہ، بٹلیاں، یونین کونسل انوار شریف کے مضافاتی علاقوں چندیرہ، کپہ بٹ، چڑکپورہ، کہوڑی، سرلی سچہ، کھنیاں کے علاوہ دلائی، یونین کونسل اپر گوجرہ، اپر پترینڈ، ایئر پورٹ، گن چھتر سمیت دیگر علاقوں کے ہزاروں عاشقان مصطفٰی نے شرکت کی۔ قومی سیرت کانفرنس سے عالمی مبلغ اسلام علامہ مولانا سید فاروق حسین شاہ سیفی نے خصوصی خطاب کرتے ہوئے کہا کہ ربیع الاول کا مہینہ اہلِ ایمان کے لیے عظیم رحمت ہے، کیونکہ اسی مہینے میں نبی کریم ﷺ کی ولادت ہوئی جو تمام جہانوں کے لیے باعثِ رحمت ہیں۔ امت مسلمہ کے لیے سب سے بڑا سرمایہ حضور ﷺ کی سیرتِ طیبہ ہے۔ اگر ہم حضور ﷺ کی تعلیمات کو اپنی عملی زندگی میں نافذ کریں تو معاشرہ امن و سکون، اخوت و محبت اور انصاف کا گہوارہ بن سکتا ہے۔ آج کے حالات اس امر کے متقاضی ہیں کہ ہم سیرت النبی ﷺ کو اپنائیں اور دین کی اصل روح کو دنیا کے سامنے پیش کریں۔ انہوں نے کہا کہ ولادتِ مصطفیٰ ﷺ صرف ایک تاریخی واقعہ نہیں بلکہ یہ دن انسانیت کی رہنمائی اور ہدایت کا دن ہے، اس لیے اس موقع پر ہمیں اپنی زندگیوں کا محاسبہ کرنا چاہیے اور دیکھنا چاہیے کہ ہم کہاں تک تعلیماتِ نبوی ﷺ پر عمل کر رہے ہیں۔
