مظفرآباد (محاسب نیوز)آزاد کشمیر کی سیاسی فضا ان دنوں ایک تازہ ہوا کے جھونکے کی مانند محسوس ہو رہی ہے، اور اسی فضا میں سپیکر قانون ساز اسمبلی و قائم مقام صدر آزاد کشمیر چوہدری لطیف اکبر نے گزشتہ روز مرکزی ایوانِ صحافت مظفرآباد کا دورہ کیا۔ اس موقع پر صدر پریس کلب سجاد قیوم میر، انتظامیہ اور سینئر صحافیوں کے ساتھ گفتگو کرتے ہوئے انہوں نے ایسے خیالات کا اظہار کیا جو ایک نئی سیاسی روشنی کا پیغام لیے ہوئے تھے۔چوہدری لطیف اکبر نے کہا کہ آزاد کشمیر میں پیپلز پارٹی کی حکومت کے قیام کے بعد عوام کے چہروں پر خوشی کی جو لہر دوڑی ہے، وہ اس حقیقت کی غمازی کرتی ہے کہ ریاست کے عوام آج بھی دل و جان سے پیپلز پارٹی کی قیادت اور اس کے عوامی منشور پر مکمل اعتماد رکھتے ہیں۔ انہوں نے کہا کہ پیپلز پارٹی محض ایک سیاسی جماعت نہیں بلکہ عوام کے دکھ درد کی ساتھی، ان کے حقوق کی امین اور ریاستی خدمت کے لیے اپنی قیادت سے لے کر کارکنوں تک بے شمار قربانیاں پیش کرنے والی جماعت ہے۔سپیکر نے اس بات پر زور دیا کہ گزشتہ دور میں رکے ہوئے ترقیاتی کام، جمہوری عمل میں تعطل، اور عوامی مسائل پر جمی گرد اب صاف ہونا شروع ہو چکی ہے۔ پیپلز پارٹی کی حکومت نے ریاست میں تعمیر و ترقی اور جمہوریت کے استحکام کے ایک نئے باب کا آغاز کیا ہے۔ انہوں نے کہاان شاء اللہ عوام کی محرومیوں اور مایوسیوں کا بوجھ ہم ان سے اتار کر دم لیں گے، اور انہیں ترقی، امن، سکون اور خوشحالی کی حقیقی منزل تک ضرور پہنچائیں گے۔چوہدری لطیف اکبر کا کہنا تھا کہ حکومت سنبھالنے کے بعد عوام کی آنکھوں میں امید کی جو روشنی جگمگانے لگی ہے، اور چہروں پر جو مسکراہٹ لوٹی ہے، وہ آنے والے بہتر مستقبل کا پیش خیمہ ہے۔انہوں نے کہا کہ بہت جلد عوام تبدیلی کو نہ صرف محسوس کریں گے بلکہ اس کے ثمرات بھی پائیں گے۔ قائم مقام صدر نے ریاستی عوام سے اپیل کی کہ وہ پیپلز پارٹی کے اس سفرِ خدمت پر بھروسہ رکھیں، کیونکہ یہ حکومت عوام کی مایوسیاں ختم کرنے، ان کے دکھوں کو کم کرنے اور انہیں حق دار خوشحالی سے ہمکنار کرنے کا عزم رکھتی ہے.
