پشاور (بیورو رپورٹ)وزیراعلیٰ خیبر پختونخوا محمد سہیل آفریدی نے سنٹرل جیل پشاور کا تفصیلی دورہ کیا، جہاں انہوں نے سی سی ٹی وی کیمروں اور دیگر جدید آلات پر مشتمل سکیورٹی سسٹم کا باضابطہ افتتاح کیا۔ یہ منصوبہ 44 کروڑ روپے کی لاگت سے مکمل کیا گیا ہے۔ وزیراعلیٰ نے منشیات کے عادی قیدیوں کی بحالی کے مرکز اور ماڈل انٹرویو روم کا بھی افتتاح کیا، جبکہ قیدیوں کی سہولیات میں بہتری کے لیے دو کروڑ روپے کی فراہمی اور صوبہ بھر کی جیلوں کی سولرائزیشن کا اعلان بھی کیا۔ دورے کے دوران وزیراعلیٰ نے جیل میں قائم میڈیکل وارڈ اور ای وزٹ سسٹم کا تفصیلی معائنہ کیا، قیدیوں سے ملاقات کی، ان کے مسائل سنے اور متعدد امور پر موقع پر ہی فوری احکامات جاری کیے۔ وزیراعلیٰ نے اس موقع پر صوبے کی جیلوں میں قیدیوں کی سزا میں دو ماہ کی خصوصی معافی کا اعلان کرتے ہوئے کہا کہ صوبہ بھر کی جیلوں میں جرمانوں کی عدم ادائیگی کے باعث قید افراد کے جرمانے صوبائی حکومت ادا کرے گی۔ انہوں نے قیدیوں کی شکایات کے فوری ازالے کے لیے ڈیجیٹل کمپلینٹ سیل کے قیام کی بھی ہدایت جاری کی۔ مزید برآں وزیراعلیٰ نے جیل میں اسپتال کے قیام کے لیے متعلقہ حکام سے سفارشات طلب کیں جبکہ کم عمر لڑکوں اور خواتین کے لیے علیحدہ خصوصی سیلز بنانے کی بھی ہدایت کی۔ انہوں نے خیبر پختونخوا کی جیلوں میں قیدیوں کے لیے فیملی کوارٹرز کی سہولیات میں مزید بہتری لانے کی بھی ہدایت کی۔ وزیراعلیٰ نے دیگر صوبوں میں قید خیبر پختونخوا کے قیدیوں کو اپنے صوبے منتقل کرنے کے لیے متعلقہ صوبوں کو خطوط ارسال کرنے، قیدیوں کے مسائل سننے کے لیے آئندہ ہفتے دربار/کھلی کچہری کے انعقاد، اور پیرول اینڈ پروبیشن ایکٹ 2022 پر مو¿ثر اور سختی سے عملدرآمد یقینی بنانے کی ہدایت کی۔ اس موقع پر وزیراعلیٰ نے کہا کہ وہ جنوری میں سنٹرل جیل پشاور کا دوبارہ دورہ کریں گے اور اس وقت تک تمام جائز مطالبات کے حل کے ساتھ جاری کردہ ہدایات پر واضح پیش رفت نظر آنی چاہیے۔ انہوں نے واضح کیا کہ جیل کا مقصد محض سزا دینا نہیں بلکہ اصلاح ہے، تاکہ قیدی یہاں سے بہتر اور مفید شہری بن کر نکلیں۔ وزیراعلیٰ نے کہا کہ صوبائی حکومت انسانوں پر سرمایہ کاری کر رہی ہے اور عوام کو خدمات و سہولیات کی بہترین فراہمی یقینی بنانے کے لیے اداروں کو عصری تقاضوں سے ہم آہنگ کیا جا رہا ہے۔ سانحہ آرمی پبلک اسکول کے حوالے سے اپنے خیالات کا اظہار کرتے ہوئے وزیراعلیٰ نے کہا کہ جب بھی سولہ دسمبر آتا ہے تو یہ دلخراش سانحہ پوری قوم کے غم کو تازہ کر دیتا ہے۔ انہوں نے کہا کہ سانحہ اے پی ایس ملک و قوم کی تاریخ کا ایک ایسا المیہ ہے جسے کبھی فراموش نہیں کیا جا سکتا۔
