مظفرآباد(خبر نگار خصوصی)اخباری دنیا کا ایک اور چمکتا ستارہ غروب ہو گیا، سید ممتاز ہمدانی سابق نیوز ایڈیٹر روزنامہ محاسب بھی چل بسے۔ان کی نماز جنازہ آبائی گاؤں سنگڑ سیداں میں ادا کر کے سینکڑوں سوگواران کی موجودگی میں سپردِ خاک کر دیا گیا۔اس موقع پر سپیکرقانون ساز اسمبلی چوہدری لطیف اکبر نے کہا کہ مرحوم کی شعبہ صحافت کے لئے گراں قدر خدمات ہیں انہوں نے قلمی محاذ پر پسے ہوئیطبقات کی آواز بن کر ان کی مسائل ومشکلات کو اقتدار کے ایوانوں تک پہنچانے میں اپنا کردار ادا کیا انتہائی خوش اخلاق اور خود دار شخصیت کے مالک تھے جبکہ ایڈیٹر روز نامہ محاسب وسابق صدرسیدآفاق حسین شاہ نے کہا کہ مرحوم سید ممتاز ہمدانی نے 1998میں محاسب کا ڈیسک سنبھالا تھا۔زلزلہ 2005میں بھی انتہائی نامساعد حالات کے باوجود اخبار کی اشاعت کو یقینی بنایے رکھا۔ 2005 سے قبل اخبارات اور پرنٹ میڈیا کو بہت اہمیت حاصل تھی، سید ممتاز ہمدانی جیسے وفا شعار اور مخلص شخص کی دستیابی کی وجہ سے محاسب اخبار ریاست کا مقبول ترین اخبار بنا۔انتہائی شریف النفس،ہنس مکھ، شریں زبان اور خوش اخلاقی آپ کی پہچان تھی۔تمام مکاتب فکر خاص کر سیاسی سماجی مذہبی تجارتی تنظیموں کے وہ کارکنان جن کی کہیں رسائی نہ ہوتی آپ ان کے لیے سایہ شجر دار کی طرح تھے،صحافتی میدان میں قسمت آزمائی کرنے والوں کو جس طرح آپ نے راستے فراہم کیے وہ رہتی دنیا تک یاد رکھے جائیں گے۔۔آپ ضلع جہلم ویلی کی ایک توانا آواز کہلاتے تھے۔سابق صدر مرکزی ایوان صحافت سید آفاق حسین شاہ کے قیمتی اور بااعتماد ساتھیوں میں ممتاز ہمدانی، طاہر فاروقی،جہانگیر اعوان،عنصر خواجہ،میربشارت حسین،مشتاق کیانی،ظہیر نقوی،اکمل راجہ، سردار ابو بکر صدیق،اذکار نقوی شامل ہیں۔ ممتاز ہمدانی تقریباً سات سال قبل بیمار ہوگئے تھے، ان کی آنکھوں کی بینائی چلی گئی تو انہوں نے اخبار چھوڑ دیا تھا،آپ بڑے بلند حوصلے ہمت والے انسان تھے، موذی مرض لاحق ہونے کے باجود آپ کے منہ سے ناشکری کے الفاظ ادا نہیں ہوئے۔سیاسی سماجی شخصیات سمیت اخبار بینی سے متعلقہ مختلف مکاتب فکر نے ممتاز ہمدانی کی وفات پر گہرے دکھ و افسوس کا اظہار کرتے ہوئے صحافیوں تنویر احمد تنولی، میر بشارت حسین،شہزاد لولابی،عبدالواجد خان،خواجہ محسن مختیار،سمیت محاسب سٹاف اور دیگر نے انکی نماز جنازہ میں شرکت کی اوربلندی درجات اور مغفرت کے لیے دعا کرتے ہوئے سوگواران خاندان کے علاؤہ روزنامہ محاسب کے زمہ دران سے اظہار تعزیت کیا ہے،اللہ پاک مرحوم کو کروٹ کروٹ جنت الفردوس میں مقام عیلین عطا فرمائے۔
