محکمہ تعلیم ضلع گلگت کے زیر اہتمام تحصیل سطح کا شاندار اسپورٹس ویک کا انعقاد

گلگت(محاسب نیوز)محکمہ تعلیم ضلع گلگت کے زیرِ اہتمام ایک شاندار اسپورٹس ویک کا انعقاد کیا گیا، جس میں ضلع گلگت کی تینوں تحصیلوں گلگت، دنیور اور جگلوٹ کے درمیان دلچسپ اور سنسنی خیز مقابلے ہوئے۔تقریب کے مہمانِ خصوصی ڈائریکٹر اسپورٹس بورڈ گلگت بلتستان شاہ محمد تھے، جبکہ ڈپٹی ڈائریکٹر ایجوکیشن گلگت اشتیاق احمد نے بطور میر محفل شرکت کی۔تحصیلوں کے درمیان والی بال، کرکٹ اور فٹبال کے مقابلے انتہائی جوش و خروش سے جاری رہے۔ختتامی مقابلہ فٹبال کا تھا، جو تحصیل جگلوٹ اور تحصیل دنیور کے درمیان کھیلا گیا۔ اس سنسنی خیز میچ میں تحصیل جگلوٹ نے شاندار کارکردگی کا مظاہرہ کرتے ہوئے فتح اپنے نام کی۔قابل ذکر بات یہ ہے کہ تحصیل جگلوٹ نے نہ صرف فٹبال بلکہ والی بال اور کرکٹ تینوں ایونٹس میں کامیابی حاصل کی، اور مجموعی طور پر اسپورٹس ویک کی چیمپئن ٹیم قرار پائی۔جیتنے والی ٹیم کو ڈائریکٹر اسپورٹس بورڈ گلگت بلتستان شاہ محمد کی جانب سے دو لاکھ روپے نقد انعام،جبکہ دوسرے نمبر پر آنے والی ٹیم کے لیے ایک لاکھ پچاس ہزار روپے کا اعلان کیا گیا۔اسپورٹس ویک نے نوجوانوں میں کھیلوں کا جذبہ، ٹیم ورک اور صحت مند مقابلے کا رجحان مزید مضبوط کیا، اور یہ ضلع گلگت میں کھیلوں کے فروغ کی ایک شاندار مثال بن کر سامنے آیا۔