اوگی (نامہ نگار)ڈسٹرکٹ پولیس آفیسر مانسہرہ شفیع اللہ گنڈا پورنے اتوار کے روز تھانہ اوگی اور تھانہ خاکی کا سرپرائز وزٹ کرتے متعلقہ ایس ایچ آوز دیگر پولیس حکام کو عوامی شکایات کے فوری ازالے، کرائم کنٹرول اور پولیس سہولیات کے حوالے سے اہم ہدایات جاری کردیں وزٹ کے دوران ڈی پی او مانسہرہ نے تھانوں کا ریکارڈ اور درخواستوں کا تفصیلی جائزہ لیا۔ انہوں نے محرر سٹاف سے تمام تفصیلات لیں اور سختی سے ہدایت دی کہ تھانے آنے والے سائلین کے ساتھ خوش اخلاقی، صبر و برداشت اور بہترین رویہ اپنایا جائے تاکہ ان کی مشکلات بروقت حل ہو سکیں۔اس موقع پر لیڈی مدد محرر سے بھی خواتین کی طرف سے درج کی جانے والی شکایات اور ان کے ازالے کے بارے میں تفصیلات معلوم کی گئیں۔ ڈی پی او مانسہرہ نے دونوں تھانوں اور متعلقہ سرکلز کی حدود میں جرائم کی مجموعی صورتحال کا بھی جائزہ لیا اور ڈی ایس پی سرکل اوگی وحید خان، ڈی ایس پی سرکل بفہ پکھل شاہجہان خان سمیت ایس ایچ اوز کو سختی سے ہدایت کی کہ چوری، راہزنی اور دیگر جرائم پیشہ عناصر کے خلاف جامع حکمت عملی کے تحت فوری کارروائیاں یقینی بنائی جائیں۔مزید برآں، انہوں نے تھانوں کی بلڈنگ، انفراسٹرکچر اور دستیاب سہولیات کا بھی معائنہ کیا اور اس بات پر زور دیا کہ پولیس اہلکاروں کو بہتر سہولیات فراہم کی جائیں تاکہ وہ مزید جانفشانی کے ساتھ عوام کی خدمت کر سکیں۔ڈی پی او مانسہرہ نے کہا کہ کمیونٹی پولیسنگ پر عملدرآمد، پیدل گشت، موبائل گشت اور رائیڈرز گشت کے نظام کو مو¿ثر بنایا جائے تاکہ امن و امان کی صورتحال بہتر سے بہتر ہو اور عوام کو پولیس کے ساتھ مزید قریبی تعلق اور اعتماد حاصل ہوسکے
